१३ असार २०७९, सोमबार
३० बैशाख २०७७, मंगलवार ०१:२२

खोटाङमा ११ महिने शिशुसहित ३ जना होम क्वारेन्टाईनमा, ६ जना क्वारेन्टाईनमा


खोटाङ – जिल्लाको दिप्रुङ चुईचुम्मा गाउँपालिकाले बिराटनगरबाट गाडी रिजर्भ गरेर आएका ३ जनालाई होम क्वारेन्टाईनमा र ६ जनालाई क्वारेन्टाईनमा राखेको छ। जिल्ला प्रशासन कार्यालय मोरङबाट अनलाईन सवारी पास लिएर गाउँ आइपुगेका ११ महिने शिशु सहित ९ जनालाई अवस्था हेरेर क्वारेन्टाइन र होमक्वारेन्टाइनमा राखिएको गाउँपालिकाले जनाएको छ। गाउँपालिका भित्रिएको रातो प्लेट भएको जीपलाई नियन्त्रणमा लिएर चालक तथा यात्रुलाई आईतबारदेखि १४ दिनका लागि क्वारेन्टाइन र होमक्वारेन्टाइनमा राखिएको गाउँपालिका अध्यक्ष भूपेन्द्र राईले बताए।

११ महिनाका शिशु, शिशुका आमा र एक जना अपांगता भएका व्यक्तिलाई होम क्वारेन्टाइनमा र तथा जीपका चालक सहित ६ जनालाई क्वारेन्टाइनमा राखिएको छ। उनीहरु बिराटनगरबाट जनही ३ हजार ४ सय तिरेर गाउँ आएको खुलेको छ। लकडाउनकाबीचमा घर आउनेमा दिप्रुङ चुईचुम्मा गाउँपालिका–२ डाँडागाउँका ६ जना र दिप्रुङ चुईचुम्मा गाउँपालिका–५ सछितापोखरीका २ जना छन्। नियन्त्रणमा लिइएको जीपलाई गाउँपालिकाको प्रांगणमा राखेर चालकलाई पनि क्वारेन्टाइनमा लगिएको गाउँपालिका अध्यक्ष राईले बताए। कोरोना भाइरसको संक्रमण फैलिन नदिनका लागि दिप्रुङ चुईचुम्मा गाउँपालिकाले सुरुदेखि नै गाउँपालिका भित्रिन र बाहिरिनमा कडाई गरेको छ।

Tags :

प्रतिक्रिया दिनुहोस !