१८ मंसिर २०७७, बिहीबार
५ कार्तिक २०७७, बुधबार ०६:३१

धुलिखेल अस्पतालमा कोरोना संक्रमित उपचारका लागि न्युनतम ५० हजार धरौटी राख्‍नुपर्ने


तस्बिर स्रोत : एम एण्ड एस म्यागजिन

काभ्रे — धुलिखेल अस्पतालले कोरोना संक्रमितले धरौटी रकम नबुझाए भर्ना नपाइने सूचना निकालेको छ । कात्तिक २ गतेको निर्णयअनुसार शुल्क स्वयं बिरामीले व्यहोर्नुपर्ने भन्दै भर्ना हुनुअघि अस्पतालको नगद शाखामा धरौटी राख्नुपर्ने सूचनामा उल्लेख छ ।

सूचनामा सामान्य लक्षण भएका बिरामीले ५० हजार धरौटी राख्नुपर्ने, मध्य जटिल बिरामीले १ लाख र जटिल बिरामीको उपचारका लागि २ लाख धरौटी राख्नुपर्ने छ ।

अस्पतालले औषधि तथा रोग निदानमा प्रयोग हुने जाँच तथा अक्सिजन तथा भेन्टिलेटर चलाएमा थप शुल्क लाग्ने बताएको छ । अस्पतालका प्रशासकीय निर्देशक डा. रमेश मकाजुले धरौटी रकमबाट यो शुल्कहरु काटिने बताए । उनले भने, ‘हामीले बिरामीसँग जथाभावी पैसा उठाउन खोजेको होइन, सरकारको नियमअनुसार गरेको हो, सक्नेले तिरुन् भन्ने हो । तिर्न नसक्नेले निःशुल्क नै पाउँछन् ।’

स्वास्थ्य तथा जनसंख्या मन्त्रालयले कात्तिक २ गतेदेखि सरकारले तोकको लक्षित समूह बाहेकका सबै व्यक्तिको परीक्षण र उपचार आफ्नै खर्चमा गर्नुपर्ने निर्णय गरेको थियो । यो निर्णय धेरै अस्पताहरुले कार्यान्वयनमा ल्याइसकेका छन् ।

आर्थिक रुपमा विपन्न, अशक्त तथा असहाय अवस्थामा रहेका नागरिक, असहाय एकल महिला, अति अपाङ्गता भएका नागरिक, जेष्ठ नागरिक, अग्रपंत्तिमा खटिने स्वास्थ्यकर्मी, सरसफाई कर्मचरी, सुरक्षाकर्मी लगायतको मात्रै सरकारले निःशुल्क परीक्षण र उपचार गर्ने मन्त्रालयले जनाएको छ । जसमा कुनै बीमा कम्पनीबाट कोरोना बीमा गरेको भएमा परीक्षण र उपचार बीमा रकमबाट काटिने छ ।


प्रतिक्रिया दिनुहोस !