८ कार्तिक २०७७, शनिबार
१० आश्विन २०७७, शनिबार ०९:३९

चितवनमा स्क्रबटाइफस र डेंगुका बिरामी वढे


चितवन।भरतपुर अस्पतालमा दुई महीनामा ६९ जनालाई स्क्रबटाइफस र २४ जनालाई डेंगु देखिएको छ ।

अस्पतालका सूचना अधिकारी लिलाधर पौडेलका अनुसार साउन र भदौमा परीक्षण गरिएका ३४५ जनाको नमूनामा ६९ जनामा स्क्रबटाइफस देखिएको हो।  सोही अवधिमा ३१५ जनाको परीक्षण गर्दा २४ जनामा डेंगु देखिएको छ।
 
मुसामा हुने एकप्रकारको माइट भन्ने सङ्क्रमित किर्नाको माध्यमबाट ओरियन्टिया सुत्सुगामुसी भन्ने व्याक्टेरियाको कारणले स्क्रब टाइफस हुने भरतपुर अस्पतालका डा. महेन्द्र अग्रहरिले बताए। 

यो रोग वर्षाको समयमा देखिन्छ। उक्त किर्नाले टोकेको सामान्यतया ५ देखि २० दिनभित्र यो रोगको लक्षण देखिन थाल्छ। यसमा विशेषरी उच्च ज्वरो आउने, शरीरमा टोकेको ठाउँमा घाउ हुने, जण्डीस हुने, पेट दुख्ने चिकित्सकले बताएका छन्। 

यसै गरी एडिस जातको पोथी लामखुट्टेको टोकाइबाट सङ्क्रमण हुने भाइरल ज्वरो मध्ये एक डेंगु हो। यसको सङ्क्रमणमा शुरूआती दिनमा शरीरमा रातो रातो डावर आउने, एक सय डिग्री भन्दा वढी ज्वरो आउने, गिजा र पिसाबमा रगत देखिने जस्ता लक्षण देखा पर्ने डा. अग्रहरिले जानकारी दिए। रासस


प्रतिक्रिया दिनुहोस !