काठमाडौँ, १२ कात्तिक । मंसिर महिनादेखि स्वास्थ्य तथा जनसंख्या मन्त्रालय सिंहदरबार भित्र सर्ने भएको छ ।
सर्वोच्च अदालत पछाडीपट्टी रहेको नेपाली सेनाको नर्सिङ दल गणको नाममा भएको खाली जग्गामा फ्रिफ्याव भवन निर्माण भइरहेको छ ।
मन्त्रालयका प्रवक्ता डा.प्रकाश बुढाथोकीले विश्व स्वास्थ्य संगठनको आर्थिक तथा प्राविधिक सहयोगमा नेपाली सेनाको नर्सिङ दल गणको नाममा भएको खाली जग्गामा फ्रिफ्याव भवन निर्माण भइरहेको जानकारी दिनुभयो ।
उहाँले विश्व स्वास्थ्य संगठन (डब्लूएचओ)को सहयोमा छ वटा फ्रिफ्याव भवन निर्माण भइरहेको जानकारी दिदै ढिलोमा मंसिर १ गतेदेखी सर्ने तयारी रहेको बताउनुभयो ।
सेनाको सो गण प्रधानमन्त्री कार्यालय नजिक सरे पछि खाली रहेको त्यस क्षेत्रको जग्गा र भवनहरु स्वास्थ्य तथा जनसंख्या मन्त्रालयका लागि छुट्याइएको हो ।
केही कोठाहरु नर्सिङ दल गणको पुराना कोठाहरु पनि प्रयोग हुने उहाँको भनाई छ ।
जेनजी आन्दोलनले विध्वंशात्मक रुप लिएको दिन २४ भदौमा रामशाहपथस्थित स्वास्थ्य तथा जनसंख्या मन्त्रालयको मुल भवन आगलागीमा परेपछि अहिले पछाडीपट्टी रहेको नेपाल स्वास्थ्य अनुसन्धान परिषद्को नयाँ भवनमा शरण लिएर बसेको छ ।
प्रवक्ता डा. बुढाथोकीले कात्तिक महिना भर रामशाहपथबाट मन्त्रालयको सेवा चले पनि मंसिर १ गतेदेखि सिंहदरबारबाट सेवा दिने गरी तयारी भएको जानकारी दिनुभयो ।
